Meiningsmåling pukkverk Knutsvikheia

Hjelmeland kommune har lagt Kommunedelplan for byggeråstoff ut til høyring med frist 16.april.
Til planen er det kome innspel frå Mibau Stema AS om pukkverksuttak i Knutsvikheia, sjå kart under.   Kommunestyret har i høyringsutkastet sagt «ja» til å gå vidare med uttaksområdet. Dette er ikkje eit endeleg «ja», men opnar opp for å mogleg vurdere det  inn i kommuneplanen sin arealdel, med oppstart haust 25.

Me viser til to folkemøte kommunen har hatt om planen + eitt infomøte Mibau Stema hadde om innspelet haust 24.  Her finn de høyringsutkast Kommunedelplan byggeråstoff.
Sjå spesielt kap 7.2.1 Pukk

Jøsneset bygdaråd legg nå til rette for ei meiningsmåling blant Jøsnesbuen.

Møt opp på Trivselstova for å gi di meining:

Mandag 7.april             19.00-20.00
Lørdag 12. april            10.00-12.00
Mandag 14. april         17.00-19.00

Alle over 15 år (dvs blir 16 ila 2025) som er folkeregistrert på Jøsneset kan røyste.
Me lagar sedlar som blir lagt i ei stemmeurne, og valet blir hemmeleg. 
Me tel opp resultatet etter siste dag.

Resultatet  blir sendt over til Hjelmeland kommune som ein «uttale»  til planarbeidet.

Spørsmålet blir:

Vil du at pukkuttak på Knutsvikheia- Jøsneset skal inn i  Hjelmeland sin Kommunedelplan for byggeråstoff? Kryss av:

JA                           NEI                         VEIT IKKJE

Kartet under er klipt frå kommunen sin plandokumentasjon:

Her er link til kommunen si nettside der alle plandokumenta ligg, inkl grov konsekvensutgreiing

JØSNESET BYGDARÅD SI ROLLE I SAKA:

Jøsneset bygdaråd er ein velforening for alle i bygda. 
Kva rolle Bygdarådet skal ha blei drøfta på årsmøtet 4.mars 2025.  Her er referat frå sak 8:

«Sak 8 – Orientering /drøfting

Styret ønskja tilbakemelding frå årsmøtet på korleis Bygdarådet skal forhalde seg i store saker som påverkar bygda, og som det gjerne kan vere delte meiningar om, som td pågåande sak Kommunedelplan Byggeråstoff og innspel om pukkverk/steinbrot i Knutsvikheia. 

God drøfting om Bygdarådet sin rolle i slike saker, og ulike synspunkt blei lufta. Nokre meinte at det er naturleg/viktig at Bygdarådet uttalar seg, medan andre meinte at Bygdarådet skal representere alle i bygda – og i saker som denne er det då vanskeleg, då meiningane er delte.

Det som hadde mest tilslutning var at Bygdarådet si rolle er å formidle informasjon, leggje til rette for meiningsutveksling og opne møteplasser for diskusjon.  Bygdarådet forheld seg nøytrale.  Men dersom det skal formidlast eit syn «frå bygda» så skal dette skje via avstemming til dømes gjennom «postkasseundersøkelse»  eller almannamøte med hemmeleg avrøysting. Utfordringa ift almannamøte kan vere at mange ikkje møter opp. Ein må velje ein «metode» som gjer at flest mogleg kan ytre si meining, basert på sakleg informasjon.   I forhold til den nemde saka blei det òg påpeika at det pr i dag foreligg  for lite informasjon, og det er for tidleg/vanskeleg å ta stilling til nå.  Dersom ein skal gjennomføre ei avrøysting eller undersøking, så må ein vente til ein veit meir.  Bygdarådet informerte elles om at Hjelmeland kommune inviterer til informasjonsmøte om den aktuelle saken 20. mars kl 18.00 på Grendahuset, og oppmoda alle om å møte opp for å få meir informasjon».

Ettersom det nå tilsaman har vore tre opne informasjonsmøter om saka, og me har like mykje/same faktainformasjon som det kommunestyret har (som skal fatte vedtak i saka), har styret kome fram til at me legg til rette for ei meiningsmåling nå.

Metoden me har vald håpar me vil  gje dei aller fleste rom for deltaking på ein enkel og hensiktsmessig måte.

Bygdarådet sender ikkje over eigen uttale, men formidlar resultatet av meiningsmålinga til kommunen innan høyringsfristen 16.april.

Den enkelte innbyggjar kan sjølvsagt òg sende eigen uttale til planforslaget : postmottak@hjelmeland.kommune.no

Styret i Jøsneset bygdaråd

v/leiar Oddvar Skiftun

Kommunen sin presentasjon frå folkemøtet 13.mars-Grendahuset: